یا مُحَمَّدﷺ

یا مُحَمَّدﷺ

ژہٕ چھُک محبوب خُدایس یا مُحَمَّدﷺ
بہٕ لگہے ژھایس تہ گرایس یا مُحَمَّدﷺ

چانِ رُستُیہِ عَالمس اُوس بس شنیا ہی شنیا
چانِ انہٕ سأت رونق لٔج یَتھ سرائس یا مُحَمَّدﷺ

غٔمٕژ بُترأژ أس شکار اُلجھنن منز مقصد رُوس
بأوِتھ اِسلامچ دَعوتھ حل دِتُتھ نیایس یا مُحَمَّدﷺ

گرفتا اُوس انسان شِرکٔس تہ ظُلمس اندر
ہیچھ نأوتھ کَرٕنی عبادت بس خُدایس یا مُحَمَّدﷺ

کرٔتھ آزاد اُمت وہمو تہٕ ظُلماتو نِش
وَندیہ زو جان چأنس اَتھ مایس یا مُحَمَّدﷺ

گُژھ فقط محبوب آسُن ٹوٹھ رَسولِ خُدا
اَد پَگاہ روزُ مَحشر بَخشنایِس یا مُحَمَّدﷺ

گژھِ پران یوس درود و سلام شب و روز تٔمس پٹھ
تَس پَنُن دیدار ہایس یا مُحَمَّدﷺ

شؔوکتس سینہ دُودمت غمِ نبیس اندر
چھِس امید وَصلچ تریش چایس یا مُحَمَّدﷺ

( ~ شوکت بڈھ نمبل کشمیری )