نعتِ شریف: سرمایہ حیات ھے سِیرت رسول ﷺ کی

نعتِ شریف: سرمایہ حیات ھے سِیرت رسول ﷺ کی

سرمایہ حیات ھے سِیرت رسول ﷺ کی
اسرارِ کائنات ھے سِیرت رسول ﷺ کی

پُھولوں میں ھے ظہُور ستاروں میں نُور ھے
ذاتِ خُدا کی بات ھے سِیرت رسول ﷺ کی

بنجر دِلوں کو آپﷺ نے سیراب کر دیا
اِک چشمہ صفات ھے سِیرت رسول ﷺ کی

چشمِ کلیم ایک تجلّی میں بِک گئی
جلووں کی واردات ھے سیرت رسول ﷺ کی

جور و جفا کے واسطے برقِ ستم سَہے
دُنیائے التفات ھے سیرت رسول ﷺ کی

تصویرِ زندگی کو تکلّم عطا کیا
حُسنِ تصّورات ھے سیرت رسول ﷺ کی

ساغرؔ سرور و کیف کے ساغر چھلک اُٹھے
صبحِ تجلّیات ھے سیرت رسول ﷺ کی